Es zipft mi aun,
waun
i net bin, wer i bin.
Waun i spinn.
Waun i umadruck und owaschluck
wias ma geht
wals net grod zum Besten mit uns steht.
Wal owa Weihnochtn is
und i den Weihnochtsfriedn
doch des gaunze Joah üba vamiss,
holt i zur Stund
liaba mein Mund,
wal dia sunst am End wida
ane auskumman kunnt.
Es zipft mi aun,
waun
i scho was,
wia des weida geht mit dem Schas.
Wal es is net gnua, dass i olls tua
von in da fruah
bis spät in di nocht.
Wal wauns daun krocht,
wors trotzdem mei Schuld.
Wal di Geduld hot a amol a End.
Und wal i so bled bin
föhln ma just jetzt, zu Weihnochtn,
vuan zwa Zähnt.
Es hot mi, wia ma so sogt:
full darennt.
Wal grod zu Weihnochtn,
wenn alle Fotos mochn
und verschicken,
muast du ma ane picken.
Es zipft mi aun,
waun
unterm Christbam dann olle bled schaun.
Wal mia sitzen jo trotzdem zam und hom a Freid
an di Kerznan und am Schnops.
Und i was jo, dass as di reit.
Jo, sicha es tuat da lad vor die Leit.
Sogoa zu ana Entschuldigung warast bereit,
zu dera weihnochtlichn Zeit.
Owa vorigs Joah, mitn blaun Aug
hob i wenigstns die Weihnachtsbrötchen vom Spar beißn meign.
Heit geh i hungrig ham und ohne Geschenke.
Gott sei Dank worn wenigstens die Getränke
reichlich vorhaundn
I hob nur net vastaundn,
warum mei Muatta jetzt
im Sigmund Freud obgsondat sein muas.
Weihnachtn ohne ihra, ohne an Gruas?
Es zipft mi aun,
woun
da Foda ihra grod einweisn losst
zu di Feiatäig,
wou er dei Famülienfeiern doch so hosst.
Na guad. Die Brötchen hot er vuriges Joah jo a scho bschtöllt.
Wal letzts Joah hom meina Muatta die Zähnt vuan gföhlt.